ᠤᠮᠠᠷᠠᠲᠤ ᠬᠢᠯᠢ ᠎ ᠶᠢᠨ  ᠰᠤᠶᠤᠯ  — ᠡᠵᠡᠨ ᠬᠤᠷᠤᠭ᠎ᠠ ᠬᠤᠰᠢᠭᠤᠨ ᠤ  ᠭᠠᠵᠠᠷ ᠤᠨ ᠨᠡᠷᠡᠰ ᠤᠨ ᠡᠭᠦᠰᠦᠯ — ᠠᠯᠳᠠᠨᠰᠢᠷᠡᠭᠡ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2024/9/2
     ᠡᠵᠡᠨ ᠬᠤᠷᠤᠭ᠎ᠠ ᠬᠤᠰᠢᠭᠤᠨ ᠤ ᠲᠥᠪ ᠪᠣᠯᠬᠤ ᠠᠯᠳᠠᠨᠰᠢᠷᠡᠭᠡ ᠪᠠᠯᠭᠠᠰᠤ ᠶᠢ ᠤᠤᠯ ᠨᠢ ︽ᠨᠠᠷᠢᠨ ᠭᠤᠣᠯ︾ ᠭᠡᠵᠤ ᠪᠠᠶᠢᠵᠠᠢ᠃ ᠣᠳᠣ ᠠᠴᠠ ᠵᠠᠭᠤ ᠭᠠᠷᠤᠢ ᠵᠢᠯ ᠤᠨ ᠡᠮᠤᠨ᠎ᠡ ᠠᠳᠡ ᠭᠠᠭᠴᠠ ᠤᠯᠠᠭᠠᠨ ᠮᠣᠳᠣ ︵ᠪᠥᠭᠡᠷᠡᠯᠵᠢᠭᠡᠨ᠎ᠡ︶ ᠣᠷᠭᠤᠵᠤ ᠪᠠᠶᠢᠭᠰᠠᠨ ᠠᠴᠠ ᠲᠡᠷᠡ ᠬᠤᠪᠢ ᠶᠢᠨ ᠭᠠᠵᠠᠷ ᠤᠨ ᠨᠡᠷ᠎ᠡ ᠶᠢ ︽ᠤᠯᠠᠭᠠᠨ ᠮᠣᠳᠣᠨ ᠰᠤᠭᠤ︾ ᠭᠡᠵᠦ ᠪᠠᠶᠢᠭᠰᠠᠨ ᠪᠠ ᠨᠠᠶᠠᠭᠠᠳ ᠵᠢᠯ ᠤᠨ ᠡᠮᠤᠨ᠎ᠡ ᠠᠴᠠ ᠰᠠᠶ᠋ᠢ ᠠᠯᠳᠠᠨᠰᠢᠷᠡᠭᠡ ᠭᠡᠵᠦ ᠨᠡᠷᠡᠯᠡᠭᠰᠡᠨ ᠪᠠᠶᠢᠨ᠎ᠠ᠃     ᠠᠯᠳᠠᠨᠰᠢᠷᠡᠭᠡ ᠭᠡᠰᠡᠨ ᠤ ᠤᠴᠢᠷ ᠨᠢ᠄ ᠤᠷᠳᠤᠰ ᠲᠦᠮᠡᠨ ᠤ ᠷᠢᠨᠴᠢᠨ ᠵᠢᠨᠤᠩ ᠤᠨ ᠬᠤᠶᠢᠴᠢᠰ ᠪᠣᠯᠬᠤ ᠵᠢᠶᠦ᠋ᠨ ᠸᠠᠩ ᠬᠤᠰᠢᠭᠤᠨ ᠤ ᠸᠠᠩ ᠨᠣᠶᠠᠳ ᠤᠨ ᠣᠷᠳᠣᠨ ᠨᠢ ᠬᠠᠮᠤᠭ ᠤᠨ ᠠᠩᠬᠠᠨ ᠳᠠᠭᠠᠨ ᠲᠠᠯᠠᠳ ᠬᠠᠩᠬᠢᠨ ᠤ ᠰᠠᠪᠠ ᠪᠣᠯᠬᠤ ᠬᠠᠨᠲᠠᠢ ᠶᠢᠨ ᠭᠤᠣᠯ ᠤᠨ ᠡᠬᠢᠨ ᠳᠠᠬᠢ ᠰᠢᠷ᠎ᠠ ᠬᠠᠶᠢᠯᠠᠰᠤ᠂ ᠰᠤᠪᠤᠷᠭ᠎ᠠ ᠰᠤᠮᠤᠨ ᠤ ᠬᠢᠵᠠᠭᠠᠷ ᠲᠠᠬᠢ ᠳᠠᠬᠢᠯᠲᠤ ᠬᠠᠶᠢᠷᠬᠠᠨ᠂ ᠮᠥᠨ ᠬᠤᠰᠢᠭᠤᠨ ᠤ ᠪᠠᠷᠠᠭᠤᠨ ᠬᠤᠶᠢᠲᠤ ᠬᠠᠪᠢ ᠶᠢᠨ ᠲᠠᠶᠢᠵᠢᠨᠠᠷ ᠵᠣᠣ ᠶᠢᠨ ᠣᠶᠢᠷᠠᠯᠴᠠᠭ᠎ᠠ ᠨᠣᠶᠠᠨ ᠭᠤᠣᠯ ᠳᠤ ᠵᠠᠭᠤ ᠭᠠᠷᠤᠢ ᠵᠢᠯ ᠰᠠᠭᠤᠵᠤ ᠪᠠᠶᠢᠭᠠᠳ ᠸᠠᠩ ᠨᠣᠶᠠᠨ ᠤ ᠭᠡᠷ ᠤᠨ ᠬᠡᠳᠤᠨ ᠬᠦᠮᠤᠨ ᠨᠢ ᠵᠠᠯᠭᠠᠭ᠎ᠠ ᠪᠠᠷ ᠨᠠᠰᠤ ᠪᠠᠷᠠᠭᠰᠠᠨ ᠳᠤ ᠨᠤᠳᠤᠭ ᠲᠣᠬᠢᠷᠠᠬᠤ ᠦᠭᠡᠢ ᠪᠠᠶᠢᠨ᠎ᠠ ᠬᠡᠮᠡᠨ ᠰᠢᠯᠵᠢᠵᠤ᠂ ᠵᠠᠭᠤᠭᠠᠳ ᠵᠢᠯ ᠤᠨ ᠬᠤᠭᠤᠷᠤᠨᠲᠤ ᠴᠠᠭᠠᠨ ᠡᠷᠬᠢ ᠶᠢᠨ ᠵᠣᠣ᠂ ᠵᠢᠬᠢ ᠶᠢᠨ ᠲᠠᠯ᠎ᠠ᠂ ᠤᠯᠠᠭᠠᠨ ᠬᠠᠳᠠ᠂ ᠳ᠋ᠤᠭ ᠤᠨ ᠰᠢᠯᠢ ᠭᠡᠬᠦ ᠮᠡᠳᠣ ᠬᠡᠳᠤᠨ ᠭᠠᠵᠠᠷ ᠢᠶᠠᠷ ᠨᠡᠭᠦᠵᠦ ᠠᠷᠪᠠᠨ ᠳᠥᠷᠪᠡᠳᠦᠭᠡᠷ ᠵᠠᠰᠠᠭ ᠲᠡᠭᠦᠰᠡᠯᠳᠠᠬᠤᠶᠠᠲᠤ ︵ᠳᠣᠭᠰᠢᠨ ᠸᠠᠩ ᠴᠣᠯᠠ ᠲᠠᠢ︶ ᠭᠡᠷ ᠢᠶᠠᠨ ᠨᠠᠷᠢᠨ ᠭᠤᠣᠯ ᠤᠨ ᠤᠯᠠᠭᠠᠨ ᠮᠣᠳᠣᠨ ᠰᠤᠭᠤ  ᠳᠤ ᠰᠢᠯᠵᠢᠭᠦᠯᠦᠨ ᠢᠰᠡᠬᠡᠢ ᠭᠡᠷ ᠲᠠᠢ ᠰᠠᠭᠤᠵᠤ ᠪᠠᠶᠢᠵᠠᠢ᠃ ᠡᠨᠡ  ᠸᠠᠩ ᠰᠠᠶᠢᠨ ᠨᠤᠳᠤᠭ ᠰᠤᠩᠭᠤᠵᠤ ᠰᠠᠭᠤᠶ᠎ᠠ ᠬᠡᠮᠡᠨ ᠬᠦᠩ ᠤᠨ ᠵᠣᠣ ᠶᠢᠨ ᠭᠡᠭᠡᠨ ᠎ ᠠᠴᠠ ᠠᠪᠤᠷᠠᠯ ᠠᠰᠠᠭᠤᠯᠭᠠᠭᠰᠠᠨ ᠳᠤ ᠭᠡᠬᠡᠨ ᠨᠢ᠄ ︽ᠬᠤᠰᠢᠭᠤ ᠵᠠᠰᠠᠭ ᠨᠣᠶᠠᠨᠳᠠᠨ ᠪᠠᠶᠢᠭᠠᠳ ᠤᠳᠤᠷᠴᠢᠨ ᠰᠢᠭ᠋ ᠪᠠᠶᠢᠨ ᠳᠠᠬᠢᠨ ᠨᠡᠭᠦᠭᠡᠳ ᠶᠠᠭᠤ ᠬᠢᠨ᠎ᠡ︖ ᠣᠳᠣ ᠰᠠᠭᠤᠭᠰᠠᠨ ᠭᠠᠵᠠᠷ ᠴᠢᠨᠢ ᠬᠤᠰᠢᠭᠤᠨ ᠤ ᠪᠠᠨ ᠳᠤᠮᠳᠠ ᠰᠢᠭ᠋ ᠪᠠᠶᠢᠨ᠎ᠠ᠂ ᠭᠠᠵᠠᠷ ᠨᠢ ᠴᠤ ᠰᠠᠶᠢᠨ ᠨᠤᠲᠤᠭ ᠪᠠᠶᠢᠨ᠎ᠠ ᠳ᠋ᠠ︕ ᠶᠠᠭᠠᠬᠢᠵᠤ ᠭᠠᠵᠠᠷ ᠰᠢᠷᠣᠢ ᠬᠦᠨᠳᠡᠪᠠᠴᠤ ᠭᠠᠵᠠᠷ ᠯᠤᠤᠰ ᠲᠤ ᠬᠠᠷᠰᠢ ᠦᠭᠡᠢ᠂ ᠤᠷᠳᠤᠨ ᠬᠠᠷᠰᠢ ᠪᠠᠷᠢᠭᠰᠠᠨ ᠴᠤ ᠥᠴᠦᠭᠡᠨ ᠴᠤ ᠭᠠᠢ ᠦᠭᠡᠢ︾ ᠭᠡᠵᠦ ᠭᠡᠨ᠎ᠡ᠃ ᠳᠣᠭᠰᠢᠨ ᠸᠠᠩ  ᠯᠠᠮᠠ ᠶᠢᠨ ᠠᠶᠢᠯᠡᠳᠤᠭᠰᠠᠨ ᠢ ᠬᠠᠭᠠᠰ ᠢᠳᠡᠭᠡᠬᠦ ᠲᠠᠢ ᠬᠠᠭᠠᠰ ᠢᠳᠡᠭᠡᠬᠦ ᠦᠭᠡᠢ ᠲᠠᠢ ᠪᠠᠶᠢᠵᠤ ᠤᠯᠠᠭᠠᠨ ᠮᠣᠳᠣᠨ ᠰᠤᠭᠤ ᠳᠠᠭᠠᠨ ᠨᠠᠰᠤ ᠪᠠᠷᠠᠵᠠᠢ᠃    ᠬᠦᠦ ᠨᠢ ᠲᠦᠪᠰᠢᠨᠵᠢᠷᠭᠠᠯ ᠰᠢᠷ᠎ᠠ ᠮᠣᠷᠢᠨ ᠵᠢᠯ ︵1918 ᠣᠨ︶᠎ ᠳᠤ ᠬᠤᠰᠢᠭᠤᠨ ᠤ ᠵᠠᠰᠠᠭ ᠪᠣᠯᠵᠤ ᠪᠠᠰᠠ ᠯᠠ ᠭᠠᠵᠠᠷ ᠪᠦᠷᠢ ᠶᠢᠨ ᠮᠡᠷᠭᠡᠳ ᠢᠶᠠᠷ ᠨᠤᠲᠤᠭ ᠰᠢᠨᠵᠢᠬᠦᠯᠦᠭᠰᠡᠨ  ᠳᠤ ᠡᠮᠤᠨ᠎ᠡ ᠭᠠᠵᠠᠷ ᠤᠨ ᠯᠢ ᠣᠪᠤᠭ ᠲᠠᠢ ᠰᠠᠶᠢᠨ ᠰᠢᠨᠵᠢᠭᠡᠴᠢ ᠡᠨᠡ ᠬᠦ ᠤᠯᠠᠭᠠᠨ ᠮᠣᠳᠣᠨ ᠰᠤᠭᠤ ᠠᠴᠠ ᠠᠪᠴᠢᠷᠠᠭᠰᠠᠨ ᠰᠢᠷᠣᠢ ᠶᠢ ᠦᠵᠡᠵᠤ᠄ ︽ᠡᠨᠡ ᠪᠣᠯ ᠯᠤᠤ ᠤᠷᠢᠶᠠᠵᠤ ᠬᠡᠪᠲᠡᠭᠰᠡᠨ ᠭᠠᠵᠠᠷ ᠪᠠᠶᠢᠨ᠎ᠠ᠂ ᠡᠮᠤᠨ᠎ᠠ ᠨᠢ ᠯᠠᠪᠲᠠᠢ ᠬᠤᠶᠠᠷ ᠨᠠᠭᠤᠷ ᠪᠣᠢ᠂ ᠲᠡᠷᠡ ᠨᠢ ᠯᠤᠤ ᠶᠢᠨ ᠬᠤᠶᠠᠷ ᠨᠢᠳᠣ ᠨᠢ ᠪᠤᠯᠠᠢ᠃ ᠬᠤᠶᠢᠨ᠎ᠠ ᠨᠢ ᠦᠨᠳᠤᠷ ᠠᠭᠤᠯᠠ ᠪᠠᠶᠢᠨ᠎ᠠ᠂ ᠲᠡᠷᠡ ᠨᠢ ᠯᠤᠤ ᠶᠢᠨ ᠰᠡᠭᠦᠯ ᠨᠢ ᠴᠣᠬᠤᠶᠢᠵᠠᠢ᠃ ᠵᠡᠭᠦᠨ ᠪᠠᠷᠠᠭᠤᠨ ᠲᠠᠯ᠎ᠠ ᠳᠤᠨᠢ ᠨᠢᠭᠡ ᠨᠢᠭᠡ ᠲᠣᠪᠤ ᠪᠣᠢ᠂ ᠲᠡᠷᠡ ᠨᠢ ᠯᠤᠤ ᠶᠢᠨ ᠬᠤᠶᠠᠷ ᠮᠥᠷᠤ ᠪᠣᠯᠣᠨ᠎ᠠ᠃ ᠠᠳᠡ ᠶᠡᠬᠡᠰ ᠪᠤᠶᠠᠨᠳᠠᠨ ᠨᠤᠲᠤᠭᠰᠢᠬᠤ ᠰᠢᠨᠵᠢ ᠰᠠᠶᠢᠲᠠᠢ ᠪᠡᠯᠭᠡ ᠲᠡᠭᠦᠰ ᠭᠠᠵᠠᠷ ᠪᠠᠶᠢᠨ᠎ᠠ᠃ ᠨᠣᠶᠠᠨ ᠬᠦᠮᠤᠨ ᠤ ᠠᠯᠲᠠᠨ ᠰᠠᠭᠤᠳᠠᠯ ᠤᠨ ᠪᠡᠯᠭᠡ ᠳᠠᠮᠪᠡᠷᠡᠯ ᠳᠣᠲᠣᠷᠠᠨ᠎ᠠ᠃ ᠬᠤᠶᠢᠨ᠎ᠠ ᠨᠢ ᠪᠠᠶᠢᠬᠤ ᠦᠨᠳᠣᠷ ᠣᠷᠣᠢ ᠪᠣᠯ ᠠᠯᠲᠠᠨ ᠰᠠᠭᠤᠳᠠᠯ ᠤᠨ ᠲᠦᠰᠢᠯᠭᠡ ᠮᠥᠷᠲᠡᠭᠡᠨ ᠵᠠᠩᠵᠤᠨ ᠪᠠᠭᠠᠲᠤᠷ ᠤᠨ ᠮᠠᠯᠠᠭᠠᠢ ᠶᠢᠨ ᠰᠢᠨᠵᠢᠲᠠᠢ᠃ ᠬᠤᠶᠠᠷ ᠲᠠᠯ᠎ᠠ ᠳᠤᠨᠢ ᠪᠠᠶᠢᠬᠤ ᠲᠣᠪᠤ ᠲᠣᠯᠣᠭᠠᠢ ᠨᠢ ᠬᠤᠶᠠᠷ ᠭᠠᠷ ᠤᠨ ᠲᠦᠰᠢᠯᠭᠡ ᠰᠣᠭᠤᠪᠴᠢ ᠮᠠᠶ᠋ᠢᠭᠲᠠᠢ᠂ ᠬᠤᠶᠠᠷ ᠲᠠᠯ᠎ᠠ ᠪᠠᠷ ᠨᠢ ᠭᠤᠣᠯ ᠣᠷᠣᠰᠤᠭᠰᠠᠨ ᠨᠢ ᠠᠷᠭ᠎ᠠ ᠪᠢᠯᠢᠭ ᠤᠨ ᠠᠯᠢᠪᠠ ᠪᠥᠬᠦᠨ ᠢᠵᠢᠯᠢᠰᠢᠨ ᠵᠣᠬᠢᠴᠠᠬᠤ ᠶᠢᠨ ᠲᠡᠮᠳᠡᠭ᠂ ᠡᠮᠤᠨ᠎ᠠ ᠨᠢ ᠦᠨᠳᠤᠷ ᠰᠢᠯᠢ ᠬᠦᠳᠦᠶᠢᠵᠤ ᠪᠠᠶᠢᠬᠤ ᠨᠢ ᠲᠥᠷᠤ ᠵᠠᠰᠠᠭ ᠪᠠᠷᠢᠬᠤ ᠡᠷᠳᠡᠨᠢ  ᠶᠢᠨ ᠰᠢᠷᠡᠭᠡ ᠵᠣᠬᠢᠴᠠᠭᠤᠯᠤᠭᠰᠠᠨ ᠪᠠᠶᠢᠨᠠᠮ︾ ᠭᠡᠵᠡᠢ᠃      ᠲᠦ᠊ ᠸᠠᠩ ᠰᠢᠨᠵᠢᠭᠡᠴᠢ  ᠶᠢᠨ ᠬᠡᠯᠡᠭᠰᠡᠨ ᠢ ᠰᠣᠨᠣᠰᠣᠭᠠᠳ ᠪᠣᠳᠣᠭᠰᠠᠨ ᠨᠢ᠄ ᠤᠯᠠᠭᠠᠨ ᠮᠣᠳᠣᠨ ᠰᠤᠭᠤ ᠶᠢᠨ ᠠᠷᠤ ᠳᠤ ︽ᠲᠣᠭᠤᠯᠠᠭ᠎ᠠ ᠶᠢᠨ ᠣᠷᠣᠢ︾ ᠭᠡᠬᠦ ᠠᠭᠤᠯᠠ ᠲᠠᠢ᠂ ᠪᠠᠷᠠᠭᠤᠨᠲᠠᠢ ᠨᠢ ︽ᠠᠪᠲᠡᠷ᠎ᠠ ᠲᠡᠭᠡᠭ︾ ᠭᠡᠬᠦ ᠣᠷᠣᠢ᠂ ᠵᠡᠭᠦᠨᠳᠠᠢ ᠨᠢ ︽ᠪᠣᠷᠣ ᠲᠣᠯᠣᠭᠠᠢ︾ ᠭᠡᠬᠦ ᠣᠷᠣᠢ ᠪᠠᠶᠢᠨ᠎ᠠ᠃ ᠪᠠᠷᠠᠭᠤᠨ ᠵᠠᠬ᠎ᠠ ᠪᠠᠷ ᠨᠢ ︽ᠵᠠᠩᠭᠤᠲᠤ ᠶᠢᠨ ᠭᠤᠣᠯ︾᠂ ᠵᠡᠭᠦᠨ ᠲᠠᠯ᠎ᠠ ᠪᠠᠷ ᠨᠢ ︽ᠤᠯᠠᠭᠠᠨ ᠮᠥᠷᠡᠨ︾ ︵ᠨᠢᠭᠡ ᠰᠠᠯᠪᠤᠷᠢ ᠨᠢ ᠨᠠᠷᠢᠨ ᠭᠤᠣᠯ ᠭᠡᠳᠡᠭ︶  ᠤᠷᠤᠰᠴᠦ ᠡᠮᠤᠨ᠎ᠡ ᠨᠢ ᠬᠤᠶᠠᠷ ᠴᠠᠭᠠᠨᠠᠭᠤᠷ ︵ᠣᠳᠣ ᠤᠯᠠᠭᠠᠨᠠᠭᠤᠷ ᠭᠡᠵᠠᠢ︶᠎ ᠲᠠᠢ᠂ ᠨᠠᠭᠤᠷ ᠤᠨ ᠡᠮᠤᠨ᠎ᠡ ᠨᠢ ︽ᠳ᠋ᠤᠭ ᠤᠨ ᠰᠢᠯᠢ︾ ᠪᠠᠶᠢᠬᠤᠯᠠᠷ ᠡᠨᠡ ᠰᠢᠨᠵᠢᠭᠡᠴᠢ ᠲᠣᠰ ᠭᠠᠵᠠᠷ ᠢ ᠵᠠᠭᠤᠢ ᠣᠨᠤᠭᠠᠵᠤ ᠬᠡᠯᠡᠵᠠᠢ᠃ ᠪᠠᠰᠠ ᠠᠪᠤ ᠶᠢᠨ ᠦᠶ᠎ᠡ ᠳᠤ ᠬᠦᠩ ᠤᠨ ᠵᠣᠣ ᠶᠢᠨ ᠭᠡᠭᠡᠨ ᠪᠠᠭᠰᠢ ᠶᠢᠨ ᠠᠶᠢᠯᠠᠳᠤᠭᠰᠠᠨ ᠠᠪᠤᠷᠠᠯ ᠲᠠᠢ ᠬᠠᠪᠢᠳᠠᠵᠤ ᠪᠠᠶᠢᠨ᠎ᠠ ᠭᠡᠵᠦ ᠰᠠᠨᠠᠭᠠᠳ ᠬᠠᠷᠠᠭᠴᠢᠨ ᠭᠠᠭ᠋ᠠᠢ ᠵᠢᠯ ︵1923 ᠣᠨ︶ ᠎ ᠳᠤ ᠤᠯᠠᠭᠠᠨ ᠮᠣᠳᠣᠨ ᠰᠤᠭᠤ ᠠᠴᠠ ᠨᠢᠭᠡ ᠭᠠᠵᠠᠷ ᠬᠢᠷᠢᠲᠠᠢ ᠪᠠᠷᠠᠭᠤᠨᠲᠠᠢ ᠨᠢ ᠪᠠᠶᠢᠬᠤ ᠲᠡᠭᠰᠢᠬᠡᠨ ᠳᠠᠪᠰᠠᠩ ᠳᠡᠭᠡᠷ᠎ᠡ ᠭᠤᠷᠪᠠᠨ ᠲᠠᠰᠤᠯᠭ᠎ᠠ ᠲᠤᠭᠤᠰᠬᠠᠨ ᠪᠠᠶᠢᠰᠢᠩ ᠪᠠᠷᠢᠵᠤ᠂ ᠡᠮᠦᠨᠡᠭᠦᠷ ᠨᠢ ᠬᠡᠳᠦᠨ ᠮᠤᠩᠭᠤᠯ ᠭᠡᠷ ᠵᠢᠭᠰᠠᠭᠠᠨ ᠸᠠᠩ ᠤᠨ ᠣᠷᠳᠤᠨ ᠪᠣᠯᠭᠠᠵᠠᠢ᠃ ᠲᠡᠭᠡᠭᠡᠳ ᠰᠢᠨᠵᠢᠭᠡᠴᠢ ᠶᠢᠨ ︽ᠨᠣᠶᠠᠨ ᠬᠦᠮᠤᠨ ᠤ ᠠᠯᠲᠠᠨ ᠰᠠᠭᠤᠳᠠᠯ ᠤᠨ ᠪᠡᠯᠭᠡ ᠳᠠᠮᠪᠡᠷᠡᠯ ᠲᠣᠲᠤᠷᠠᠨ᠎ᠠ︾ ᠭᠡᠵᠦ ᠬᠡᠯᠡᠭᠰᠡᠨ ᠦᠭᠡ ᠶᠢ ᠦᠨᠳᠦᠰᠦᠯᠡᠵᠤ ᠨᠤᠲᠤᠭ ᠤᠨ ᠬᠥᠮᠤᠰ ︽ᠠᠯᠳᠠᠨᠰᠢᠷᠡᠭᠡ︾ ᠭᠡᠵᠦ ᠨᠡᠷᠡᠶᠢᠳᠬᠦ ᠪᠣᠯᠵᠠᠢ᠃   ︵ᠰᠠᠶᠢᠨᠵᠢᠷᠭᠠᠯ︶            ︽ᠮᠠᠨᠠᠷᠠᠵᠦ ᠬᠠᠷᠠᠭᠳᠠᠬᠤ ᠡᠵᠡᠨ ᠬᠤᠷᠤᠭ᠎ᠠ︾ ᠭᠡᠬᠦ ᠨᠤᠮ ᠠᠴᠠ ᠬᠠᠭᠤᠯᠤᠨ ᠰᠡᠶᠢᠷᠡᠬᠦᠯᠪᠡ  
ᠢᠷᠡᠯᠲᠡ᠄ ᠡᠵᠡᠨ ᠬᠤᠷᠤᠭ᠎ᠠ ᠬᠤᠰᠢᠭᠤᠨ ᠤ ᠠᠷᠠᠳ ᠤᠨ ᠵᠠᠰᠠᠭ ᠤᠨ ᠤᠷᠳᠤᠨ