ᠤᠷᠳᠤᠰ ᠮᠤᠩᠭᠤᠯᠴᠤᠳ ᠤᠨ ᠬᠤᠪᠴᠠᠰᠤ ᠬᠤᠨᠠᠷ ᠤᠷᠠᠯᠠᠵᠤ ᠡᠮᠦᠰᠬᠦ ᠵᠠᠩ ᠣᠢᠯᠠ(ᠨᠢᠭᠡ) ᠮᠠᠯᠠᠭᠠᠢ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2024/12/8
      ᠤᠷᠳᠤᠰ ᠮᠤᠩᠭᠤᠯᠴᠤᠳ ᠡᠷᠡᠭᠲᠡᠢ ᠡᠮᠡᠭᠲᠡᠢ ᠢᠯᠭᠠᠯ ᠦᠭᠡᠢ ᠮᠠᠯᠠᠭᠠᠢ ᠵᠡᠭᠦᠵᠦ ᠠᠯᠴᠢᠭᠤᠷ ᠤᠷᠢᠶᠠᠵᠤ ᠶᠠᠪᠤᠳᠠᠭ ᠣᠨᠴᠠᠯᠢᠭ ᠲᠠᠢ᠃ ᠮᠤᠩᠭᠤᠯ ᠮᠠᠯᠠᠭᠠᠢ ᠶᠢᠨ ᠲᠦᠷᠤᠯ ᠵᠦᠶᠢᠯ  ᠳᠤ ᠬᠠᠷᠴᠠᠭᠠᠢ ᠮᠠᠯᠠᠭᠠᠢ᠂ ᠲᠤᠭᠤᠢ ᠮᠠᠯᠠᠭᠠᠢ᠂ ᠲᠤᠭᠤᠷᠴᠤᠭ ᠮᠠᠯᠠᠭᠠᠢ᠂ ᠰᠠᠷᠠᠪᠴᠢᠲᠤ ᠮᠠᠯᠠᠭᠠᠢ᠂ ᠲᠯᠤᠭᠠᠢ ᠶᠢᠨ ᠠᠯᠴᠢᠭᠤᠷ ᠵᠡᠷᠭᠡ ᠤᠯᠠᠨ ᠲᠦᠷᠤᠯ ᠪᠠᠶᠢᠵᠤ ︽ᠣᠪᠣᠭ᠎ᠠ ᠪᠣᠰᠬᠠᠭᠵᠤ᠂ ᠣᠶᠣᠳᠠᠯ ᠳᠠᠭᠠᠷᠠᠭᠤᠯᠵᠤ᠂ ᠬᠤᠣᠰ ᠣᠨᠵᠢᠭᠤᠯᠵᠤ᠂ ᠬᠤᠰᠢᠮᠠᠭ ᠵᠠᠩᠬᠢᠳᠤᠵᠠᠢ︾ ᠭᠡᠬᠦ ᠪᠤᠶᠤ ︽ᠬᠠᠩᠭᠠᠢ ᠮᠣᠳᠤᠨ ᠳᠤ ᠬᠠᠭᠠᠯᠭ᠎ᠠ ᠦᠭᠡᠢ ᠭᠡᠷ︾ ᠭᠡᠵᠦ ᠣᠨᠢᠰᠤᠭᠠᠯᠠᠳᠠᠭ᠃ ᠡᠭᠡᠯ ᠠᠷᠠᠳ ᠪᠣᠯ ᠡᠩ  ᠤᠨ ᠬᠤᠷᠠᠭᠠᠨ ᠠᠷᠠᠰᠤᠨ ᠪᠦᠷᠭᠦᠳ ᠮᠠᠯᠠᠭᠠᠢ ᠪᠤᠶᠤ ᠬᠤᠶᠠᠷ ᠴᠢᠬᠢᠪᠴᠢᠲᠤ ᠦᠨᠡᠭᠡᠨ ᠠᠷᠠᠰᠤᠨ ᠮᠠᠯᠠᠭᠠᠢ᠂ ᠡᠮᠡᠭᠳᠡᠶᠢᠴᠤᠳ ᠨᠢ ᠦᠩᠭᠡ ᠶᠢᠨ ᠠᠯᠴᠢᠭᠤᠷ ᠤᠷᠢᠶᠠᠬᠤ  ᠠᠴᠠ ᠭᠠᠳᠠᠨ᠎ᠠ᠂ ᠪᠠᠶᠠᠨ ᠨᠣᠶᠠᠳ ᠢᠵᠡᠭᠤᠷᠠᠨ ᠨᠠᠷ ᠨᠢ ᠤᠳᠤᠭ᠎ᠠ ᠲᠠᠢ ᠲᠤᠭᠤᠢ ᠬᠠᠷ᠎ᠠ ᠲᠠᠩᠰᠡᠨ ᠮᠠᠯᠠᠭᠠᠢ᠂ ᠬᠠᠳᠤᠭᠲᠠᠢ ᠨᠠᠷ ᠨᠢ ᠯᠤᠤ ᠶᠢᠨ ᠬᠤᠸᠠᠷᠲᠠᠢ᠂ ᠮᠦᠩᠭᠦᠨ ᠡᠷᠭᠭᠢᠭᠦᠯᠭᠡᠲᠡᠢ ᠬᠠᠷ᠎ᠠ ᠳᠠᠩᠰᠡᠨ ᠮᠠᠯᠠᠭᠠᠢ ᠵᠡᠭᠦᠳᠡᠭ᠃ ᠣᠳᠣ ᠳᠣᠲᠣᠷ᠎ᠠ ᠭᠠᠵᠠᠷ ᠤᠨ ᠢᠷᠭᠡᠨ ᠤ ᠡᠮᠦᠰᠭᠡᠯ ᠵᠡᠭᠦᠯᠭᠡ  ᠶᠢᠨ ᠨᠥᠯᠥᠭᠡ ᠪᠠᠷ ᠮᠤᠩᠭᠤᠯ ᠮᠠᠯᠠᠭᠠᠢ ᠶᠢᠨ ᠰᠣᠶᠣᠯ ᠣᠷᠣᠨ ᠪᠠᠶᠢᠷᠢ ᠪᠠᠨ ᠠᠯᠳᠠᠵᠤ ᠤᠯᠠᠯᠠᠩᠬᠢ ᠵᠠᠯᠠᠭᠤᠴᠤᠳ ᠬᠠᠭᠤᠴᠢᠨ ᠮᠣᠩᠭᠤᠯ ᠣᠨᠴᠠᠯᠢᠭ ᠢ ᠬᠠᠲᠠᠭᠠᠯᠠᠭᠰᠠᠨ ᠮᠠᠯᠠᠭᠠᠢ ᠶᠢ ᠵᠡᠭᠦᠬᠦ ᠪᠠᠨ ᠪᠣᠯᠢᠵᠤ ᠰᠢᠨ᠎ᠠ ᠮᠠᠶ᠋ᠢᠭ ᠤᠨ ᠮᠠᠯᠠᠭᠠᠢ ᠪᠠᠷ ᠮᠤᠩᠭᠤᠯ ᠮᠠᠯᠠᠭᠠᠢ ᠪᠠᠨ ᠣᠷᠣᠯᠠᠭᠤᠯᠬᠤ ᠪᠣᠯᠣᠭᠰᠠᠨ ᠪᠠᠶᠢᠨ᠎ᠠ᠃ ᠡᠨᠡ ᠨᠢ ︽ᠰᠢᠷᠡᠭᠡᠨ ᠳᠤ ᠲᠤᠷᠠᠯᠠᠭᠠᠳ ᠰᠢᠷᠢᠳᠡᠭ ᠢᠶᠠᠨ ᠠᠯᠳᠠᠵᠤ᠂ ᠰᠢᠨ᠎ᠡ  ᠳᠤ ᠲᠤᠷᠠᠯᠠᠵᠤ ᠬᠠᠭᠤᠴᠢᠨ ᠢᠶᠠᠨ ᠬᠠᠶᠠᠵᠤ︾ ᠪᠠᠶᠢᠭ᠎ᠠ ᠶᠠᠪᠤᠳᠠᠯ ᠪᠣᠯᠬᠤ ᠶᠤᠮ᠃     ᠮᠠᠯᠠᠭᠠᠢ ᠪᠣᠯ ᠬᠦᠨᠳᠤᠳᠭᠡᠯ ᠬᠤᠪᠴᠠᠯᠠᠯ ᠪᠣᠯᠬᠤᠷ ᠮᠠᠯᠠᠭᠠᠢ  ᠶᠢ ᠪᠤᠷᠤᠭᠤ ᠬᠠᠨᠳᠤᠭᠤᠯᠵᠤ ᠵᠡᠭᠦᠬᠦ᠂ ᠭᠡᠳᠡᠷᠬᠦ ᠬᠠᠷᠠᠭᠤᠯᠵᠤ ᠲᠠᠯᠪᠢᠬᠤ ︵ᠴᠦᠯᠡᠭᠳᠡᠬᠦ ᠬᠦᠮᠤᠨ ᠤ ᠮᠠᠯᠠᠭᠠᠢ ᠪᠤᠶᠤ ᠵᠣᠯᠢᠭ ᠲᠤ ᠭᠠᠷᠬᠤ ᠮᠠᠯᠠᠭᠠᠢ ᠶᠢ ᠰᠠᠶ᠋ᠢ ᠢᠩᠭᠢᠳᠡᠭ ᠭᠡᠨ᠎ᠡ︶᠃ ᠮᠠᠯᠠᠭᠠᠢ ᠬᠠᠶᠠᠵᠤ ᠣᠷᠬᠢᠬᠤ ᠪᠤᠶᠤ ᠰᠣᠯᠢᠵᠤ ᠵᠡᠭᠦᠬᠦ ︵ᠮᠠᠯᠠᠭᠠᠢ ᠬᠠᠶᠠᠪᠠᠯ ︽ᠮᠢᠬᠠᠨ ᠣᠪᠣᠭ᠎ᠠ ᠮᠠᠯᠠᠭᠠᠢ ᠶᠢᠨ ᠲᠠᠯᠪᠢᠭᠤᠷ︾ ᠭᠡᠵᠦ ᠵᠢᠮᠡᠯᠡᠭᠳᠠᠨ᠎ᠠ᠂ ᠴᠡᠪᠠᠷ ᠭᠠᠵᠠᠷ ᠰᠢᠲᠠᠭᠠᠵᠤ ᠬᠠᠶᠠᠨ᠎ᠠ᠃ ᠰᠣᠯᠢᠵᠤ ᠵᠡᠭᠦᠪᠡᠯ ᠬᠡᠢ ᠮᠣᠷᠢ ᠰᠣᠯᠢᠭᠳᠠᠨ᠎ᠠ ᠭᠡᠳᠡᠭ︶᠂ ᠮᠠᠯᠠᠭᠠᠢ ᠶᠢ ᠬᠡᠯᠳᠡᠭᠡᠢ ᠬᠠᠵᠠᠭᠠᠢ᠂ ᠵᠥᠷᠢᠭᠦᠦ ᠮᠣᠷᠣᠢ ᠵᠡᠭᠦᠬᠦ᠂ ᠵᠠᠯᠠᠭ᠎ᠠ ᠦᠭᠡᠢ ᠪᠠᠷ ᠵᠡᠭᠦᠬᠦ᠂ ᠡᠮᠤᠨ᠎ᠠ ᠰᠠᠷᠠᠪᠴᠢ ᠶᠢ ᠨᠢ ᠪᠠᠭᠤᠯᠭᠠᠵᠤ ᠵᠡᠭᠦᠬᠦ ︵ᠵᠥᠷᠢᠭᠦᠦ ᠵᠡᠭᠦᠪᠡᠯ ᠰᠤᠷᠭᠠᠯ ᠦᠭᠡᠢ ᠬᠡᠭᠳᠡᠨ᠎ᠠ᠃ ᠵᠠᠯᠠᠭ᠎ᠠ ᠦᠭᠡᠢ ᠵᠡᠭᠦᠪᠡᠯ ᠪᠡᠯᠪᠡᠰᠤᠷᠠᠯ ᠤᠨ ᠶᠣᠰᠤ ᠭᠡᠨ᠎ᠡ᠃ ᠰᠠᠷᠠᠪᠴᠢ ᠶᠢ ᠨᠢ ᠪᠠᠭᠤᠯᠭᠠᠵᠤ ᠵᠡᠭᠦᠪᠡᠯ ᠪᠠᠶᠠᠷ ᠮᠠᠩᠨᠠᠢ ᠶᠢ ᠳᠠᠷᠤᠵᠤ ᠭᠠᠢ ᠵᠣᠪᠡᠯᠠᠩ ᠪᠣᠯᠣᠨ᠎ᠠ ᠭᠡᠨ᠎ᠡ︶᠂ ᠥᠪᠡᠷ ᠤᠨ ᠮᠠᠯᠠᠭᠠᠢ ᠪᠠᠨ ᠭᠡᠭᠡᠭᠡᠳ ᠳᠠᠬᠢᠨ ᠤᠯᠠᠬᠤ᠂ ᠬᠦᠮᠤᠨ ᠤ ᠬᠡᠭᠡᠭᠰᠡᠨ ᠮᠠᠯᠠᠭᠠᠢ ᠶᠢ ᠣᠯᠵᠤ ᠠᠪᠬᠤ᠂ ᠮᠠᠯᠠᠭᠠᠢ ᠳᠤ ᠬᠡᠬᠡᠳ ᠭᠠᠷ ᠬᠦᠷᠬᠦ᠂ ᠲᠡᠭᠡᠭᠰᠢ ᠬᠠᠷᠠᠭᠤᠯᠵᠤ ᠲᠠᠯᠪᠢᠬᠤ ︵ᠮᠠᠯᠠᠭᠠᠢ ᠪᠠᠨ ᠭᠡᠭᠡᠪᠡᠯ ᠵᠣᠪᠠᠯᠠᠩ ᠢᠶᠠᠨ ᠬᠠᠶᠠᠨ᠎ᠠ ᠭᠡᠨ᠎ᠡ᠂ ᠭᠡᠭᠡᠭᠰᠡᠨ ᠮᠠᠯᠠᠭᠠᠢ ᠶᠢ ᠡᠷᠢᠵᠤ ᠣᠯᠪᠠᠯ ᠦᠬᠦᠨ᠎ᠡ ᠭᠡᠳᠡᠭ᠃ ᠮᠠᠯᠠᠭᠠᠢ ᠪᠠᠷ ᠨᠠᠭᠠᠳᠤᠪᠠᠯ ᠮᠤᠩᠬᠠᠭ ᠪᠣᠯᠣᠨ᠎ᠠ᠂ ᠳᠡᠭᠡᠭᠰᠢ ᠬᠠᠷᠠᠭᠤᠯᠵᠤ ᠲᠠᠯᠪᠢᠪᠡᠯ ᠡᠪᠡᠳᠴᠢᠨ ᠭᠤᠶᠣᠵᠤ ᠪᠠᠶᠢᠨ᠎ᠠ ᠪᠡᠯᠭᠡ ᠦᠭᠡᠢ ᠭᠡᠳᠡᠭ︶᠂ ᠮᠠᠯᠠᠭᠠᠢ ᠶᠢ ᠭᠠᠵᠠᠷ ᠬᠠᠶᠠᠬᠤ ᠪᠤᠶᠤ ᠬᠠᠮᠢᠶ᠎ᠠ ᠦᠭᠡᠢ ᠪᠤᠰᠤᠳ ᠬᠤᠪᠴᠠᠰᠤ ᠲᠠᠢ ᠨᠡᠶᠢᠯᠡᠭᠦᠯᠵᠤ ᠲᠠᠯᠪᠢᠬᠤ ︵︽ᠬᠤᠶᠠᠷ ᠬᠦᠮᠤᠨ ᠳᠤ ᠨᠢᠭᠡ ᠨᠢ ᠠᠬᠠᠯᠠᠳᠠᠭ᠂ ᠭᠠᠭᠴᠠ ᠬᠦᠮᠤᠨ ᠳᠤ ᠮᠠᠯᠠᠭᠠᠢ ᠨᠢ ᠠᠬᠠᠭᠯᠠᠳᠠᠭ︾ ᠭᠡᠰᠡᠨ ᠬᠦᠨᠳᠤᠳᠭᠡᠯ ᠶᠣᠰᠤ ᠪᠣᠯᠠᠢ︶᠂ ᠮᠠᠯᠠᠭᠠᠢ ᠶᠢ ᠡᠵᠡᠨ ᠤ ᠬᠢᠨᠢ ᠵᠥᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠵᠡᠭᠦᠬᠦ ︵ᠬᠡᠷᠪᠡ ᠵᠡᠭᠦᠬᠦ ᠴᠢᠬᠤᠯᠠᠲᠠᠢ ᠪᠣᠯ ᠳᠣᠲᠣᠷ᠎ᠠ ᠨᠢ ᠨᠢᠯᠪᠤᠭᠰᠠᠨ ᠳᠦᠷᠢ ᠭᠠᠷᠭᠠᠭᠠᠳ ᠵᠡᠭᠦᠬᠦ ᠪᠤᠶᠤ ︽ᠮᠢᠨᠤ ᠮᠠᠯᠠᠭᠠᠢ ᠪᠢᠰᠢ︾ ᠭᠡᠵᠦ ᠬᠡᠯᠡᠭᠡᠳ ᠲᠤᠮ ᠬᠢᠵᠦ ᠵᠡᠭᠦᠨ᠎ᠡ︶᠂ ᠬᠦᠮᠤᠨ ᠤ ᠮᠠᠯᠠᠭᠠᠢ ᠶᠢ ᠠᠪᠴᠤ ᠶᠠᠪᠤᠬᠤ ︵︽ᠲᠣᠯᠣᠭᠠᠢ ᠶᠢ ᠨᠢ ᠠᠪᠤᠪᠠᠴᠤ᠂ ᠮᠠᠯᠠᠭᠠᠢ ᠶᠢ ᠨᠢ ᠠᠪᠬᠤ ᠦᠭᠡᠢ︾ ᠭᠡᠳᠡᠭ︶᠂ ᠮᠠᠯᠠᠭᠠᠢ ᠭᠠᠵᠠᠷ ᠤᠨᠠᠬᠤ᠂ ᠬᠢᠰᠬᠢᠬᠦ᠂ ᠳᠡᠭᠡᠭᠦᠷ ᠎ ᠨᠢ ᠠᠯᠬᠤᠬᠤ ︵ᠬᠡᠢ ᠮᠣᠷᠢ ᠬᠡᠪᠲᠡᠨ᠎ᠠ ᠭᠡᠵᠦ ᠳᠣᠣᠷ᠎ᠠ ᠨᠢ ᠭᠠᠯ  ᠳᠤ ᠠᠷᠢᠭᠤᠳᠬᠠᠨ᠎ᠠ︶᠂ ᠮᠠᠯᠠᠭᠠᠢ ᠶᠢᠨ ᠰᠢᠷᠢᠭᠡᠰᠦ ᠶᠢ ᠰᠣᠨᠳᠤᠭᠤᠢ ᠪᠠᠷ ᠣᠶᠣᠬᠤ᠂ ᠮᠠᠯᠠᠭᠠᠢ ᠶᠢᠨ ᠤᠷᠣᠭᠰᠢ ᠬᠠᠷᠷᠠᠭᠰᠠᠨ ᠬᠡᠰᠡᠭ ᠢ ᠤᠨᠵᠢᠭᠤ ᠪᠠᠶᠢᠯᠭᠠᠬᠤ ︵ᠨᠤᠲᠤᠭ ᠤᠮᠤᠭ ᠤᠨ ᠪᠡᠯᠭᠡ ᠲᠡᠮᠳᠡᠭ ᠭᠦᠢᠴᠡᠭᠡ ᠦᠭᠡᠢ ᠭᠡᠬᠦ ᠪᠤᠶᠤ ᠬᠡᠢ ᠮᠣᠷᠢ ᠳᠣᠷᠣᠶᠢᠲᠠᠨ᠎ᠠ ᠭᠡᠳᠡᠭ︶᠂ ᠮᠠᠯᠠᠭᠠᠢ ᠪᠠᠷ ᠪᠡᠯᠡᠭ ᠬᠦᠷᠭᠡᠬᠦ᠂ ᠴᠢᠬᠢ ᠶᠢ ᠨᠢ ᠳᠡᠭᠡᠭᠰᠢ ᠲᠠᠲᠠᠬᠤ ᠦᠭᠡᠢ ᠪᠠᠷ ᠠᠶᠢᠯ  ᠳᠤ ᠣᠷᠣᠬᠤ᠂ ᠠᠶᠢᠯ ᠳᠤ ᠳᠤᠷ᠎ᠠ  ᠪᠠᠷ ᠮᠠᠯᠠᠭᠠᠢ ᠪᠠᠨ ᠠᠪᠬᠤ᠂ ᠮᠠᠯᠠᠭᠠᠢ ᠪᠠᠷ ᠭᠡᠷ ᠤᠨ ᠳᠣᠲᠣᠭᠤ᠂ ᠤᠨᠢ ᠮᠥᠷᠭᠦᠬᠦ ᠵᠡᠷᠭᠡ ᠶᠢ ᠣᠨᠴᠠᠭᠠᠢ ᠴᠡᠭᠡᠷᠯᠡᠬᠦ ᠶᠣᠰᠤᠨ ᠪᠣᠢ᠃               ︽ᠤᠷᠳᠤᠰ ᠮᠤᠩᠭᠤᠯᠴᠤᠳ ᠤᠨ ᠤᠯᠠᠮᠵᠢᠯᠠᠯᠲᠤ  ᠡᠳ᠋ᠯᠡᠯ  ᠬᠡᠷᠡᠭᠰᠡᠯ ᠤᠨ ᠰᠤᠶᠤᠯ︾ ᠭᠡᠭᠦ  ᠨᠤᠮ ᠠᠴᠠ ᠪᠠᠭᠤᠯᠭᠠᠪᠠ                
ᠢᠷᠡᠯᠲᠡ᠄ ᠡᠵᠡᠨ ᠬᠤᠷᠤᠭ᠎ᠠ ᠬᠤᠰᠢᠭᠤᠨ ᠤ ᠠᠷᠠᠳ ᠤᠨ ᠵᠠᠰᠠᠭ ᠤᠨ ᠤᠷᠳᠤᠨ