ᠤᠷᠳᠤᠰ ᠮᠤᠩᠭᠤᠯᠴᠤᠳ ᠤᠨ ᠬᠤᠪᠴᠠᠰᠤ ᠬᠤᠨᠠᠷ ᠤᠷᠠᠯᠠᠵᠤ ᠡᠮᠦᠰᠬᠦ ᠵᠠᠩ ᠦᠢᠯᠡ( ᠨᠠᠢᠮᠠ)ᠬᠠᠨᠵᠢᠶᠠᠷ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2024/12/11
      ᠤᠷᠳᠤᠰ ᠠᠷᠠᠳ ᠤᠨ ᠳᠠᠭᠤᠤ  ᠳᠤ ︽ᠬᠠᠷ᠎ᠠ ᠶᠤ᠋ ᠲᠤᠷᠭᠠᠨ ᠬᠠᠨᠵᠢᠶᠠᠷ ᠢ ᠴᠢᠨᠢ ᠭᠦ᠋ /ᠬᠠᠷᠠᠩᠭᠤᠢ ᠰᠥᠨᠢ ᠳᠤ ᠪᠠᠨ ᠣᠶᠣᠭᠠᠳ ᠥᠭᠭᠦᠭᠰᠡᠨ ᠶᠤᠮ ᠳ᠋ᠣᠤ ᠁︾ ᠭᠡᠵᠦ ᠤᠶᠠᠷᠠᠭᠤᠨ ᠰᠠᠶᠢᠬᠠᠨ ᠳᠠᠭᠤᠯᠠᠳᠠᠭ ᠠᠴᠠ ᠬᠠᠨᠵᠢᠶᠠᠷ ᠪᠣᠯ ᠤᠷᠳᠤᠰᠴᠤᠳ ᠤᠨ ᠴᠢᠬᠤᠯᠠ ᠬᠤᠪᠴᠠᠰᠤ ᠵᠠᠰᠠᠯ ᠭᠡᠳᠡᠭ ᠢ ᠮᠡᠳᠡᠵᠤ ᠪᠣᠯᠣᠨ᠎ᠠ᠃ ᠤᠷᠳᠤᠰ ᠲᠤ ᠡᠷᠡᠭᠲᠡᠢ ᠡᠮᠡᠭᠲᠡᠢ ᠦᠭᠡᠢ ᠪᠦᠷ ᠬᠠᠨᠵᠢᠶᠠᠷ ᠡᠮᠦᠰᠬᠦ ᠪᠥᠭᠡᠳ ᠡᠮᠡᠭᠳᠡᠶᠢᠴᠤᠳ ᠤᠨ ᠬᠠᠨᠵᠢᠶᠠᠷ ᠪᠣᠯ ᠤᠷᠲᠤ ᠬᠤᠪᠴᠠᠰᠤᠨ ᠤ ᠪᠠᠨ ᠭᠠᠲᠠᠭᠤᠷ ᠳᠠᠪᠬᠤᠷᠯᠠᠵᠤ ᠡᠮᠦᠰᠳᠡᠭ ᠦᠩᠭᠡ ᠵᠠᠰᠠᠯ ᠤᠨ ᠬᠤᠪᠴᠠᠰᠤ᠂ ᠡᠰᠭᠡᠵᠦ ᠣᠶᠣᠬᠤ ᠤᠷᠠᠯᠠᠯ ᠨᠢ ᠤᠤᠵᠢ ᠰᠢᠭ᠋ ᠤᠷᠲᠤ ᠬᠤᠷᠮᠤᠢ ᠦᠭᠡᠢ  ᠠᠴᠠ ᠪᠢᠰᠢ ᠪᠤᠰᠤᠳ ᠨᠢ ᠴᠥᠮ ᠤᠤᠵᠢ ᠲᠠᠢ ᠠᠳᠠᠯᠢᠬᠠᠨ ᠤᠬᠤᠷ ᠬᠤᠪᠴᠠᠰᠤ ᠶᠢᠨ ᠨᠢᠭᠡ ᠲᠦᠷᠤᠯ ᠪᠣᠯᠣᠨ᠎ᠠ᠃ ᠬᠠᠨᠵᠢᠶᠠᠷ ᠢ ᠡᠰᠭᠡᠵᠦ ᠤᠷᠠᠯᠠᠬᠤ  ᠳᠤ ᠪᠠᠨ ᠬᠡᠷᠡᠭᠯᠡᠬᠦ ᠬᠤᠷᠭᠤᠢ᠂ ᠲᠤᠷᠭ᠎ᠠ ᠪᠠ ᠲᠡᠭᠦᠨ ᠤ ᠦᠩᠭᠡ ᠶᠢ ᠮᠥᠨ ᠡᠮᠦᠰᠬᠦ ᠬᠦᠮᠤᠨ ᠤ ᠪᠡᠶ᠎ᠡ ᠪᠢᠯᠲᠠᠷ᠂ ᠨᠠᠰᠤ ᠵᠢᠯ᠂  ᠵᠢᠰᠤ ᠴᠢᠷᠠᠢ᠂ ᠳᠤᠷᠠᠰᠢᠯ ᠵᠡᠷᠭᠡ ᠪᠠ ᠳᠣᠲᠣᠭᠤᠷ ᠨᠢ ᠡᠮᠦᠰᠬᠦ ᠬᠤᠪᠴᠠᠰᠤᠨ ᠤ ᠦᠩᠭᠡ ᠲᠠᠢ ᠨᠢ ᠵᠣᠬᠢᠴᠠᠭᠤᠯᠤᠨ ᠰᠤᠩᠭᠤᠵᠤ  ᠪᠡᠯᠡᠳᠭᠡᠨ᠎ᠡ᠃ ᠭᠤᠣᠯ ᠦᠩᠭᠡ ︵ᠰᠠᠭᠤᠷᠢ ᠦᠩᠭᠡ︶᠎ ᠶᠢ ᠤᠯᠠᠭᠠᠨ᠂ ᠬᠤᠨᠳᠠᠨ᠂ ᠬᠥᠬᠡ᠂ ᠬᠠᠷ᠎ᠠ ᠵᠡᠷᠭᠡ ᠶᠢᠨ ᠦᠩᠭᠡ ᠠᠴᠠ ᠠᠯᠢ ᠵᠣᠬᠢᠷᠠᠬᠤ ᠳᠤᠷᠠᠰᠢᠯ ᠢᠶᠠᠷ ᠢᠶᠠᠨ ᠰᠤᠩᠭᠤᠵᠤ ᠪᠣᠯᠳᠠᠭ᠃ ᠬᠡᠷᠡᠭᠯᠡᠬᠦ ᠦᠩᠭᠡ ᠪᠠᠨ ᠰᠤᠩᠭᠤᠭᠰᠠᠨ ᠤ ᠰᠠᠭᠤᠷᠢᠨ ᠳᠡᠭᠡᠷ᠎ᠡ ᠪᠦᠰᠡᠯᠡᠭᠦᠷ ᠢᠶᠠᠷ ᠢᠶᠠᠨ ᠢᠪᠴᠣ ᠰᠢᠭ᠋᠂ ᠬᠠᠨᠴᠤᠢ ᠦᠭᠡᠢ᠂ ᠰᠢᠯᠤᠭᠤᠨ ᠡᠩᠬᠡᠷ ᠲᠠᠢ᠂ ᠬᠤᠶᠠᠷ ᠲᠠᠯ᠎ᠠ ᠳᠤ ᠪᠠᠨ ᠳᠥᠷᠪᠡᠨ ᠬᠤᠷᠤᠭᠤ ᠬᠢᠷᠢ ᠤᠨᠤᠭᠤ ᠵᠠᠶᠢᠴᠠ ᠲᠠᠢ᠂ ︵︽ᠰᠤᠯᠠ ᠬᠠᠨᠵᠢᠶᠠᠷ︾ ᠭᠡᠵᠦ ᠠᠷᠤ ᠤᠨᠤᠭᠤ ᠪᠠ ᠬᠤᠶᠠᠷ ᠲᠠᠯ᠎ᠠ ᠶᠢᠨ ᠵᠠᠶᠢᠴᠠ ᠦᠭᠡᠢ ᠪᠠᠷ ᠣᠶᠣᠭᠰᠠᠨ ᠴᠤ ᠪᠠᠶᠢᠳᠠᠭ︶ ᠬᠥᠪᠡᠭᠡ ᠵᠠᠬ᠎ᠠ ᠵᠠᠭᠠᠮ᠎ᠠ  ᠪᠠᠷ ᠢᠶᠠᠨ 3 — 4 ᠬᠤᠷᠤᠭᠤ ᠥᠷᠭᠡᠨ ᠬᠥᠪᠡᠭᠡ ᠲᠠᠢ ᠡᠰᠭᠡᠵᠦ᠂ ᠳᠤᠷᠭ᠎ᠠ ᠪᠤᠶᠤ ᠡᠩ ᠤᠨ ᠪᠥᠰ ᠢᠶᠠᠷ ᠲᠤᠳᠤᠷᠯᠠᠳᠠᠭ᠃ ᠬᠥᠪᠡᠭᠡ ᠶᠢ ᠨᠢ ᠮᠥᠨ ᠴᠦ ᠬᠤᠷᠭᠤᠢ ᠪᠤᠶᠤ ᠴᠡᠴᠡᠭ ᠬᠤᠸᠠᠷᠲᠠᠢ ᠦᠩᠭᠡ ᠦᠩᠭᠡ ᠶᠢᠨ ᠠᠷᠲᠠᠢ ᠳᠤᠷᠭ᠎ᠠ ᠪᠠᠷ ᠬᠢᠵᠦ᠂ ᠬᠥᠪᠡᠭᠡ ᠶᠢᠨ ᠳᠣᠣᠷ ᠲᠠᠯ᠎ᠠ ᠶᠢ ᠨᠢ ᠳᠠᠭᠠᠭᠤᠯᠤᠨ ᠠᠯᠲᠠᠨ ᠵᠡᠬᠡᠭ ᠪᠤᠶᠤ ᠦᠩᠭᠡ ᠦᠩᠭᠡ ᠶᠢᠨ ᠵᠡᠬᠡᠭ ᠢ ᠬᠤᠯᠢᠯᠳᠤᠭᠤᠯᠤᠨ ᠣᠶᠣᠪᠡᠯ ᠨᠡᠩ ᠭᠤᠶᠣ ᠰᠠᠶᠢᠬᠠᠨ ᠪᠣᠯᠳᠠᠭ᠃ ᠡᠩᠬᠡᠷ  ᠲᠤ ᠨᠢ ᠮᠦᠩᠭᠦᠨ ᠡᠷᠪᠡᠬᠡᠢ ᠲᠣᠪᠴᠢ᠂  ᠪᠠᠭᠪᠠᠭᠠᠢ ᠲᠣᠪᠴᠢ᠂ ᠵᠡᠰ ᠭᠠᠤᠯᠢ ᠪᠠᠷ ᠬᠢᠭᠰᠡᠨ ᠪᠥᠭᠡᠷᠡᠩᠬᠡᠢ ᠲᠣᠪᠴᠢ ᠡᠰᠡᠭᠦᠯ᠎ᠡ ᠬᠤᠷᠭᠤᠢ᠂ ᠲᠣᠷᠭ᠎ᠠ ᠵᠡᠷᠭᠡ ᠪᠠᠷ ᠵᠠᠩᠬᠢᠳᠤᠭᠰᠠᠨ ᠵᠠᠩᠬᠢᠳᠤᠮᠠᠯ ᠲᠣᠪᠴᠢ ᠶᠢ ᠳᠠᠩᠴᠠᠭᠦᠦ ᠵᠠᠢ ᠲᠠᠢ ᠲᠠᠪᠤ ᠬᠠᠲᠠᠳᠠᠭ᠃ ᠪᠠᠰᠠ ᠠᠷᠤ ᠣᠨᠤᠭᠤ ᠪᠠ ᠬᠤᠶᠠᠷ ᠲᠠᠯ᠎ᠠ ᠶᠢᠨ ᠵᠠᠶᠢᠴᠠ ᠶᠢᠨ ᠳᠡᠭᠡᠲᠣ ᠬᠥᠪᠡᠭᠡᠨ ᠳᠤ ᠲᠤᠭᠤᠷ  ᠤᠨ ᠬᠡᠯᠪᠡᠷᠢᠲᠠᠢ ᠬᠡ ᠤᠭᠠᠯᠵᠠ ᠬᠥᠪᠡᠭᠡᠯᠡᠬᠦ ᠪᠤᠶᠤ ᠲᠦᠷᠪᠡᠯᠵᠢᠯᠡᠭᠦᠯᠦᠨ ᠬᠥᠪᠡᠭᠡᠯᠡᠵᠦ ᠨᠢᠭᠡ᠂ ᠬᠤᠶᠠᠷ ᠵᠡᠳᠭᠡᠭᠡ ᠣᠶᠣᠵᠤ ᠳᠠᠷᠤᠨ᠎ᠠ᠃ ᠵᠠᠷᠢᠮ ᠨᠢ ᠪᠠᠰᠠ ᠥᠷᠭᠡᠨ ᠬᠥᠪᠡᠭᠡ ᠬᠠᠨᠵᠢᠶᠠᠷ ᠡᠮᠤᠰᠣᠭ᠍ᠰᠡᠨ ᠳᠠᠷᠤᠭᠤᠯᠭ᠎ᠠ ᠎ ᠲᠠᠢ ᠪᠦᠰᠡᠭᠦᠢ ᠶᠢᠨ ᠭᠠᠳᠠᠷ ᠢᠷᠮᠡᠭ  ᠢᠶᠠᠷ ᠨᠢ ᠬᠤᠷᠭᠤᠢ ᠪᠤᠶᠤ ᠲᠤᠷᠭ᠎ᠠ  ᠪᠠᠷ ᠨᠠᠷᠢᠨ ᠴᠢᠮᠬᠢᠶᠠᠷᠢ ᠤᠷᠣᠭᠤᠯᠵᠤ ᠣᠶᠤᠳᠠᠭ ᠴᠤ ᠪᠣᠢ᠃ ᠡᠨᠡ ᠨᠢ ᠨᠢᠭᠡ ᠲᠠᠯ᠎ᠠ ᠎ ᠪᠠᠷ ᠴᠢᠮᠡᠭᠯᠡᠵᠦ ᠨᠦᠭᠦᠭᠡ ᠲᠠᠯ᠎ᠠ ᠪᠠᠷ ᠪᠥᠭᠡᠯᠡᠭᠰᠡᠨ ᠤᠴᠢᠷ ᠪᠣᠯᠣᠨ᠎ᠠ᠃ ᠪᠠᠰᠠ ᠬᠥᠪᠡᠭᠡ ᠡᠮᠵᠢᠶᠠᠷᠢ ᠦᠭᠡᠢ ᠳᠠᠩ ᠬᠤᠷᠭᠤᠢ ᠪᠤᠶᠤ ᠠᠷᠲᠠᠢ ᠲᠤᠷᠭ᠎ᠠ ᠪᠠᠷ ᠣᠶᠣᠭᠰᠠᠨ ᠳᠣᠲᠣᠷ ᠲᠠᠢ ᠬᠠᠨᠵᠢᠶᠠᠷ ᠴᠤ ᠪᠠᠶᠢᠳᠠᠭ᠃ ᠡᠶᠢᠮᠤ ᠬᠠᠨᠵᠢᠶᠠᠷ ᠢ ᠡᠰᠭᠡᠵᠦ ᠤᠷᠠᠯᠠᠬᠤ ᠨᠢ ᠮᠥᠨ ᠬᠥᠪᠡᠭᠡ ᠣᠷᠣᠭᠤᠯᠤᠭᠰᠠᠨ ᠬᠠᠨᠵᠢᠶᠠᠷ ᠲᠠᠢ ᠠᠳᠠᠯᠢ ᠪᠣᠯᠪᠡᠴᠤ ᠡᠮᠵᠢᠶᠠᠷᠢ ᠳᠠᠷᠤᠭᠤᠯᠬᠤ ᠦᠭᠡᠢ᠃      ᠡᠷᠡᠭᠳᠡᠶᠢᠴᠤᠳ ᠤᠷᠲᠤ ᠬᠤᠪᠴᠠᠰᠤᠨ ᠤ ᠭᠠᠳᠠᠭᠤᠷ ᠪᠠᠰᠠ ᠬᠠᠨᠵᠢᠶᠠᠷ ᠡᠮᠦᠰᠳᠡᠭ᠂ ᠬᠡᠯᠪᠡᠷᠢ ᠶᠠᠩᠵᠤ ᠨᠢ ᠡᠮᠡᠭᠲᠡᠢ ᠶᠢᠨ ᠬᠠᠨᠵᠢᠶᠠᠷ ᠲᠠᠢ ᠦᠨᠳᠦᠰᠤᠨ ᠳᠤ ᠪᠠᠨ ᠠᠨᠳᠠᠯᠢ ᠪᠣᠯᠪᠠᠴᠤ ᠪᠠᠭ᠎ᠠ ᠰᠠᠭ᠎ᠠ ᠵᠥᠷᠢᠶᠡᠲᠠᠢ ᠪᠠᠶᠢᠳᠠᠭ᠃ ᠮᠥᠨ ᠬᠠᠨᠴᠤᠢ᠂ ᠬᠤᠭᠤᠯᠠᠶᠢᠪᠴᠢ ᠦᠭᠡᠢ᠂ ᠲᠣᠳᠣᠷ ᠲᠠᠢ᠂ ᠡᠩᠬᠡᠷ ᠲᠤ ᠪᠠᠨ ᠲᠠᠪᠤᠨ ᠲᠣᠪᠴᠢ ᠲᠠᠢ ᠦᠩᠭᠡ ᠵᠠᠰᠠᠯ ᠤᠨ ᠬᠤᠪᠴᠡᠰᠤ ᠪᠣᠯᠣᠨ᠎ᠠ᠃ ᠣᠯᠠᠩᠬᠢ ᠨᠢ ᠬᠥᠪᠡᠭᠡ ᠳᠠᠷᠤᠭᠤᠯᠬᠤ ᠦᠭᠡᠢ ᠪᠠᠷ ᠳᠠᠩ ᠦᠩᠭᠡ ᠶᠢᠨ ᠬᠤᠷᠭᠤᠢ ᠪᠤᠶᠤ ᠳᠤᠷᠭ᠎ᠠ  ᠪᠠᠷ ᠣᠶᠣᠭᠰᠠᠨ ᠪᠠᠶᠢᠳᠠᠭ᠃ ᠬᠥᠪᠡᠭᠡ ᠣᠷᠣᠭᠤᠯᠤᠭᠰᠠᠨ ᠴᠤ ᠶᠡᠭᠡ ᠪᠡᠶ᠎ᠡ  ᠶᠢᠨ ᠬᠢᠨᠢ ᠥᠩᠭᠡ ᠲᠠᠢ ᠣᠶᠢᠷᠠᠯᠴᠠᠭ᠎ᠠ ᠦᠩᠭᠡ ᠪᠠᠷ ᠬᠥᠪᠡᠭᠡᠯᠡᠬᠦ ᠪᠤᠶᠤ ᠵᠠᠶᠢᠴᠠ ᠤᠨᠤᠭᠤ  ᠶᠢᠨ ᠳᠡᠭᠡᠲᠤ ᠬᠥᠪᠡᠭᠡ  ᠪᠠᠷ ᠨᠢ ᠡᠮᠡᠭᠲᠡᠢ ᠶᠢᠨ ᠬᠢ ᠰᠢᠭ ᠬᠡ ᠤᠭᠠᠯᠵᠠ ᠤᠶᠣᠳᠠᠭ ᠦᠭᠡᠢ᠂ ᠬᠤᠶᠠᠷ ᠲᠠᠯ᠎ᠠ ᠳᠤ ᠪᠠᠨ ᠳᠥᠷᠪᠡᠨ ᠬᠤᠷᠤᠭᠤ ᠬᠢᠷᠢ ᠵᠠᠶᠢᠴᠠ ᠲᠠᠢ ᠪᠤᠶᠤ ᠵᠠᠶᠢᠴᠠ ᠦᠭᠡᠢ᠂ ᠠᠷᠤ ᠳᠤ  ᠪᠠᠨ ᠤᠨᠤᠭᠤ ᠦᠭᠡᠢ᠂ ᠰᠢᠯᠤᠭᠤᠨ ᠡᠩᠬᠡᠷ ᠲᠠᠢ ᠪᠠᠶᠢᠬᠤ ᠠᠴᠠ ᠭᠠᠳᠠᠨ᠎ᠠ ᠵᠥᠷᠢᠭᠦᠦ ᠡᠩᠬᠡᠷ ᠲᠠᠢ ᠪᠠᠰᠠ ᠪᠠᠶᠢᠳᠠᠭ᠃ ᠦᠩᠭᠡ ᠶᠢ ᠨᠢ ᠭᠤᠣᠯᠳᠠᠭᠤ ᠡᠮᠦᠰᠬᠦ ᠬᠥᠮᠤᠨ ᠤ ᠨᠠᠰᠤᠨ ᠤ ᠬᠡᠮᠵᠢᠶ᠎ᠡ ᠶᠢ ᠦᠵᠡᠵᠦ ᠪᠠᠶᠢᠭᠠᠳ ᠬᠤᠷᠭᠤᠢ ᠪᠤᠶᠤ ᠬᠥᠬᠡ ᠬᠠᠷ᠎ᠠ᠂ ᠬᠦᠷᠡᠩ ᠦᠩᠭᠡ ᠶᠢᠨ ᠲᠤᠷᠭ᠎ᠠ  ᠎ ᠪᠠᠷ ᠬᠢᠳᠡᠭ᠃ ᠡᠷᠡᠭᠲᠡᠢ ᠡᠮᠡᠭᠲᠡᠢ ᠶᠢᠨ ᠬᠠᠨᠵᠢᠶᠡᠷ ᠤᠨ ᠠᠯᠢ ᠨᠢ ᠴᠦ ᠭᠡᠰᠡᠨ ᠦᠭᠡᠢ ᠴᠥᠮ ︽ᠭᠠᠩᠭᠠᠩ ᠬᠡᠣᠬᠡᠨ ᠭᠠᠷ ᠦᠭᠡᠢ︾ ᠭᠡᠬᠦ ᠳᠠᠭᠠᠪᠤᠷᠢ  ᠳᠤ ᠣᠨᠤᠭᠳᠠᠬᠤ ᠨᠢ ᠵᠦᠢ ᠪᠢᠯᠡ᠃                  ︽ᠤᠷᠳᠤᠰ ᠮᠤᠩᠭᠤᠯᠴᠤᠳ ᠤᠨ ᠤᠯᠠᠮᠵᠢᠯᠠᠯᠲᠤ  ᠡᠳ᠋ᠯᠡᠯ  ᠬᠡᠷᠡᠭᠰᠡᠯ ᠤᠨ ᠰᠤᠶᠤᠯ︾ ᠭᠡᠭᠦ  ᠨᠤᠮ ᠠᠴᠠ ᠪᠠᠭᠤᠯᠭᠠᠪᠠ  
ᠢᠷᠡᠯᠲᠡ᠄ ᠡᠵᠡᠨ ᠬᠤᠷᠤᠭ᠎ᠠ ᠬᠤᠰᠢᠭᠤᠨ ᠤ ᠠᠷᠠᠳ ᠤᠨ ᠵᠠᠰᠠᠭ ᠤᠨ ᠤᠷᠳᠤᠨ